മുഴങ്ങാത്ത മണിയൊച്ച

കിലുങ്ങുന്നവ പലതുണ്ട്
ശരീരത്തിലെ കോശങ്ങള്‍

നര്‍ത്തനമാടുമ്പോള്‍ നൂപുര മണികള്‍

മഴത്തുള്ളികളേല്‍ക്കുമ്പോള്‍

ജനാലച്ചില്ലുകള്‍ കിലുങ്ങുന്നു

മേഘങ്ങള്‍ ഏറ്റുമുട്ടുമ്പോള്‍

ഇടിനാദത്തിന്റെ മണികള്‍

സമയത്തെ സ്വന്തമാക്കി

സ്വപ്നങ്ങള്‍ കിലുങ്ങുന്നു

ആന്തരികമായ തകര്‍ച്ചകള്‍ തീര്‍ത്ത്

ഏകാന്തതയും കിലുങ്ങുന്നു

പ്രിയങ്കരമായ എന്റെ വാതില്‍ മണി മാത്രം

എന്നിട്ടും നിശബ്ദമായിരിക്കുന്നു

("The unrung ring" by Taslima Nasrin by this poem she annoyed Haseena)

സമാഗമം

നിലവിളികളുടെ പടിവാതില്‍ക്കല്‍ നിന്ന് പ്രണയം വിളിക്കുന്നു
വരിക എന്റേതാകുക
ഇനി നീയും ഞാനുമില്ല
അനാദിയായ യുഗ്മം മാത്രം
പാമ്പ് ഉറയെന്നപൊലെ
ലജ്ജ ഉരിഞ്ഞെറിയുന്നു
ഗ്രീഷ്മത്തിലെ മഞ്ഞു തുള്ളി പോലെ
ഞാന്‍ മാഞ്ഞു മാഞ്ഞു പോകുന്നു
ഉരുകിയൊലിക്കുന്ന അസ്തിത്വത്തിന്
ചോരയുടെ ചുവപ്പ് മാത്രം
ഇനി ഞാനൊരു കുരലില്ലാപ്പറവ
ഇനി ഞാനൊരു ചിറകില്ലാപ്പറവ

ഭ്രാന്തി

സൂചികള്‍ക്കിടയില്‍
തണുത്ത സമയം മുറിച്ച് തള്ളുന്ന ഘടികാരത്തിനും
ആവള്‍ക്കുമിടയില്‍ അകലം പ്രകാശ വര്‍ഷങ്ങള്‍
മഴയുടെ തൂവാനത്തിനും
ചേമ്പിലകളിലെ സംഗീതത്തിനും
പൂക്കളുടെ ധാരാളിത്തത്തിനും
കിളി മൊഴികള്‍ക്കും
ഇളക്കാനാവാത്ത നിശ്ശൂന്യതയുടെ ആഴങ്ങള്‍
കുഞ്ഞിന്റെ ചിരിയും കരച്ചിലും
അടൂപ്പിന്റെ കുറുകലും
തുറക്കാ‍ത്ത അടഞ്ഞ വാതിലുകള്‍
സ്വയം കണ്ടെത്തലുകളിലും മറവികളിലും വിട രുന്ന
ഉന്മാദപ്പൂക്കള്‍
സ്വപ്നങ്ങള്‍ കൊഴിഞ്ഞൊടുങ്ങുമ്പോള്‍
എന്നെയും നിങ്ങള്‍ വിളിക്കും ആ പേര്

അടുക്കള യന്ത്രം

ഓടിയെത്താനവത്ത ദൂരങ്ങള്‍ അളന്നു തീര്‍ക്കുക
എല്ലാ‍ ഭാഗങ്ങളും എല്ലാ സമയത്തും സുസജ്ജമാകുക
കേടുപാടുകള്‍ സ്വയം തീര്‍ത്ത്
നിര്‍ത്താതെ ഓടുക
എവിടെ കിട്ടും ഈ യന്ത്രം?
അധികം തിരയേണ്ട
അവിടെ തന്നെയുണ്ട്
നിങ്ങളുടെ അടുക്കള യന്ത്രം

മരണത്തിന്‍റെ നിറം വെളുപ്പാണ്

മരണത്തിന്‍റെ നിറം വെളുപ്പാണെന്ന് ആദ്യം പറഞ്ഞത്

ആംബുലന്‍സ് എന്ന ശവ വാഹനം

ഒന്നോര്‍ത്താല്‍ ശരി തന്നെ

മൂടി മറയ്ക്കുന്ന കച്ചക്കും

പെയ്തു തോരുന്ന മൌനത്തിനും നിറം

വെളുപ്പു തന്നെ

പരേതന്‍ അവശേഷിപ്പിക്കുന്ന ഓര്‍മകള്‍ക്ക്

കരുപ്പെശാത്ത കടും വെളുപ്പ്‌

ഓര്‍ത്താല്‍ ശരി തന്നെ

മരണത്തിന്‍റെ നിറം വെളുപ്പാണ്

അത് ആഗ്രഹിക്കുന്നവര്‍ക്കെന്കിലും